Un peregrino parte de Ourense camiño
de Santiago de Compostela nunha viaxe máxica chea de música e danza.
Esta é a proposta de Queixumes
dos pinos, nun espectáculo para teatros e auditorios no que se combina
a música, a danza e o espectáculo con proxeccións audiovisuais.
Sobre o escenario, unha trintena de músicos e bailaríns que
interpretan unha vintena de pezas de gaita, pandeireta e danza poñendo sobre o
escenario vistosas e variadas coreografías.
As danzas que compoñen ‘O folclore no
camiño’ son unha selección de coreografías diferenciadas que buscan sorprender
ó público a cada momento. Por iso, o escenario énchese non só de luces e cores
senón de ata cinco vestiarios
diferentes e multitude de obxectos que enriquecen a posta en escena, dende apeiros
de labranza ata candís e paraugas.
‘O folclore no camiño’ non é só un
espectáculo de danza. É tamén unha historia, a historia dun peregrino que viaxa a Santiago de Compostela mentres
descubre a riqueza cultural de Galicia, unha historia que da sentido a todo o
que o espectador vai a ver.
‘O folclore no camiño’ non é unha simple actuación de danza. É un espectáculo de preto de hora e media de duración no que se combinan equilibradamente danza, espectáculo e entretemento.
